வேளாண் சட்டங்களுக்கு எதிராகப் போராடி வரும் விவசாயிகள் தங்கள் போராட்டத்தைக் கைவிட வேண்டும் என்று பிரதமா் நரேந்திர மோடி நாடாளுமன்றத்தில் வேண்டுகோள் விடுத்தாா்.
டெல்லி எல்லைப் பகுதிகளில் விவசாயிகள் நடத்தி வரும் போராட்டம் 75-ஆவது நாளை எட்டியுள்ள நிலையில் பிரதமா் மோடி இக்கோரிக்கையை விடுத்துள்ளாா்.
குடியரசுத் தலைவா் உரைக்கு நன்றி தெரிவிக்கும் தீா்மானத்தின் மீதான விவாதம் மாநிலங்களவையில் திங்கள்கிழமை நடைபெற்றது. அந்த விவாதத்துக்கு பதிலளித்து, பிரதமா் மோடி பேசியதாவது:
நாட்டுக்கு சீக்கியா்களின் பங்களிப்பு மகத்தானது. நாடு அவா்களால் பல நன்மைகளை எட்டியுள்ளது. சீக்கிய குருக்களின் கொள்கைகள் சிறப்புவாய்ந்தவை. ஆனால், தற்போதைய சூழலில் சீக்கியா்களுக்கு எதிராகப் பயன்படுத்தப்படும் வாா்த்தைகளும், அவா்கள் மீது பரப்பப்படும் அவதூறுகளும் எந்தவொரு பலனையும் தராது.
வேளாண் சட்டங்களின் வாயிலாக சந்தைகள் நவீனப்படுத்தப்படும் என்பதை உறுதியுடன் தெரிவித்துக் கொள்கிறேன். வேளாண் விளைபொருள்களுக்கான குறைந்தபட்ச ஆதரவு விலை தொடா்ந்து வருகிறது. எதிா்காலத்திலும் அது தொடா்ந்து நடைமுறையில் இருக்கும். 80 கோடி மக்களுக்குக் குறைந்த விலையில் நியாய விலைக் கடைகள் மூலமாக உணவுப் பொருள்களை வழங்குவதும் தொடரும்.
இவை தொடா்பான வதந்திகளைப் பரப்புவதைக் கைவிட வேண்டும். விவசாயிகளின் வருமானத்தை உயா்த்துவதற்கான நடவடிக்கைகளிலும் மத்திய அரசு கவனம் செலுத்தி வருகிறது. நாட்டிலுள்ள மூன்றில் 2 பங்கு விவசாயிகள், சிறிய அளவிலான வேளாண் நிலத்தையை வைத்துள்ளனா்.
வேளாண் சட்டங்களானது, அந்த விவசாயிகள் தங்கள் விளைபொருள்களை நாட்டின் எந்தப் பகுதியிலும் விற்பதற்கு வழிவகை செய்துள்ளது. அதன் மூலமாக விவசாயிகள் தங்கள் வருவாயை அதிகரித்துக் கொள்ள முடியும்.
எதிா்க்கட்சிகள் ஆதரித்தன: வேளாண் சட்டங்களுக்கு எதிராக ஏன் போராடுகிறோம், அந்தச் சட்டங்களில் உள்ள குறைபாடுகள் என்ன என்பது குறித்து எந்த எதிா்க்கட்சியும் தெரிவிக்கவில்லை. அச்சட்டங்களானது விவசாயிகள் சந்தித்து வரும் பிரச்னைகளுக்கான தீா்வாக அமையும். வேளாண்துறையில் சீா்திருத்தங்களைப் புகுத்துவது தொடா்பாக முன்னாள் பிரதமா் மன்மோகன் சிங்கும் கருத்து தெரிவித்துள்ளாா்.
எதிா்க்கட்சிகளும் வேளாண் சீா்திருத்தங்களை ஆதரித்துள்ளன. ஆனால், தற்போது அச்சீா்திருத்தங்களை அவை எதிா்த்து வருகின்றன. வேளாண் சட்டங்களின் நன்மைகள் குறித்து விவசாயிகளுக்கு எடுத்துரைக்க வேண்டும். அப்போதுதான் இந்தப் பிரச்னைக்குத் தீா்வு காண முடியும். அதற்காக நாம் அனைவரும் ஒன்றிணைந்து பணியாற்றுவது அவசியம்.
மத்திய அரசு தயாா்: விவசாயிகளுடன் பேச்சுவாா்த்தை நடத்துவதற்கு மத்திய அரசு எப்போதும் தயாராக உள்ளது. எனவே, விவசாயிகள் தங்கள் போராட்டத்தைக் கைவிட வேண்டும். மத்திய வேளாண்துறை அமைச்சா் விவசாயிகளுடன் தொடா்ந்து பேச்சுவாா்த்தையில் ஈடுபட்டு வருகிறாா். இதுவரை பலகட்ட பேச்சுவாா்த்தைகள் நடைபெற்றுள்ளன. இருதரப்பினருக்கிடையேயான புரிதல் தொடா்ந்து அதிகரித்து வருகிறது.
போராட்டம் நடத்த விவசாயிகளுக்கு உரிமை உள்ளது. ஆனால், முதியோா் உள்ளிட்டோருடன் போராட்டத்தில் ஈடுபடுவது நல்லதல்ல. எனவே, போராட்டத்தைக் கைவிட்டு பேச்சுவாா்த்தை நடத்த வருகை தருமாறு விவசாயிகளுக்கு மீண்டும் அழைப்பு விடுக்கிறேன்.
வாய்ப்பளிக்க வேண்டும்: நாம் தொடா்ந்து முன்னேற வேண்டும். நம்மால் நாடு பின்னடைவைச் சந்திக்கக் கூடாது. மத்திய அரசு மேற்கொண்டுள்ள வேளாண் சீா்திருத்தங்களுக்கு விவசாயிகள், எதிா்க்கட்சிகள் உள்ளிட்ட அனைவரும் வாய்ப்பளிக்க வேண்டும். அச்சீா்திருத்தங்கள் விவசாயிகளுக்கு நன்மை அளிக்கிா என்பதை ஆராய்வதற்கு வழி ஏற்படுத்திட வேண்டும்.
சட்டங்களிலுள்ள குறைபாடுகளைச் சரிசெய்வதற்கு மத்திய அரசு தயாராக உள்ளது. வேளாண்துறையிலுள்ள பிரச்னைகளுக்கு அனைவரும் இணைந்துதான் தீா்வு காண வேண்டும். காலம் தொடா்ந்து மாறி வருகிறது. ஒரே நிலையில் நம்மால் இருக்க முடியாது. எனவே, புதிய சீா்திருத்தங்களைப் புகுத்தி நாம் தொடா்ந்து முன்னேற வேண்டும்.
நிலைப்பாட்டில் மாற்றமில்லை: கொரோனா நோய்த்தொற்று பரவல் காலத்தில், நாட்டு எல்லைப் பகுதிகளில் சவால் விடுக்கும் வகையில் சிலா் நடந்து கொண்டனா். அவா்களுக்கு நம் வீரா்கள் தக்க பதிலடி கொடுத்தனா். துணிச்சல் மிக்க வீரா்களைக் கொண்டுள்ளதற்காக நாட்டு மக்கள் அனைவரும் பெருமை கொள்ள வேண்டும்.
சீனாவுடனான எல்லைப் பகுதி விவகாரத்தில் இந்தியாவின் நிலைப்பாட்டில் எந்த மாற்றமும் இல்லை. அப்பகுதிகளில் உள்கட்டமைப்பு வசதிகள் தொடா்ந்து மேம்படுத்தப்படும் என்றாா் பிரதமா் மோடி.
